- 62 -

1375. Dezember 9.

In d. n. a. Ne successu labentis temporis per oblivionem ingratitudinis matrem beneficia graciosa nobis collata a memoria nostra vel posterorum nostrorum elabantur aut quovismodo ingrate inveniamur seu inveniantur, Nos sorores Monasterij S. Joh. Ew. in civitate Rathiboriensi sub cura et obediencia fratrum ord. Pred. constitute, videlicet Eufemia tunc priorissa Cetereque omnes et singule presentibus fatemur, universis ad quorum noticiam pervenerint pro nunc seu in futurum, notum fore cupientes, quod Illustrissimus princeps D. Joh. d. g. Opauie et Rattiborie terrarum dux, D. Anna eadem gracia earundem terrarum ducissa, conthoralis eius legittima Nec non Joh. divina clemencia prefatorum ducum filius, Affectantes sinceriter divorum principum suorum progenitorum inherere vestigijs, in suarum ac predictorum remedium animarum Altare quoddam de novo nostra in Ecclesia ad honorem sancte et individue Trinitatis fundantes instituerunt Et ut eadem salubris fundacio in retrogradum declinare non valeat, pro usu seu subsidio nostro nostrique Monasterij redditus seu censum ducalem qui focarius appellatur, in et super Civitate prenominata de consensu d. Goczczonis advocati hereditarij ibidem cum omni iuridicione et dominio assignaverunt et donaverunt et protulerunt, prout loculenter expressius in privilegio super premissis conflato ipsorum Sigillis munito et roborato, que hic tanguntur plene continetur. Ne igitur quovis cemate tante clemencie ac magnificencie prefatorum serenissimorum principum ut premissum est reperiamur ingrate, et ut iuxta ipsorum pium desiderium in dicto privilegio clarius expressatum gratanter et devote cuncta expleantur, Nos supradicte Sorores ad legendum vigilias novem leccionum omnibus quatuor temporibus et in crastinum Missam cum solempni officio defunctorum cantandam obligamus et nostras sequaces in hijs scriptis temporibus perpetuis. Insuper singulis diebus tam festivis quam ferialibus iuxta venerabilis patris fr. Helie nostri ordinis Magistri seriosum mandatum ac prefatorum Serenissimorum principum piam intencionem duas Missas de animabus per nostri ordinis fratres de conventu Rath. pro salute animarum Illustrium principum, progenitorum ipsorum, ac eciam consolacionem et felicitatem animarum earum (sic) in predicto altari legendas ac celebrandas ordinare effectualiter et providere promittimus bona fide, omni dolo occasione proculmotis sicuti eciam hijdem nostri fratres suam litteram de Reverendi patris nostri prioris provincialis licencia, ad hoc conventus ipsorum assensu concurrente, in perpetuum inviolabiliter se facturos obligaverunt. Et quia fidelis Mercenarius dignus suo reputatur labore, cum prenominatus census pro sepefato altari specialiter sit assignatus, Nos de eodem censu pretaxatis nostris fratribus conventus sepe nominati in commune de novem marcis, quarum sex pro ordeo ad cervisiam conparandam, septima in Adventu, octava in quadragesima pro pitancia dari debent, providere tenebimur indefectuabiliter annis singulis ante festum S. Martini. Nona vero Marca eiusdem pecunie in die Cinerum vel citra fratribus omnibus equaliter dividendo per nos distribui debet et donari absque dilacione. Sepe nominati eciam conventus et ordinis fratres omnibus quatuor temporibus vigilias novem leccionum et incrastinum Missam cum solempni officio defunctorum cantare nostra in Ecclesia tenebuntur secundum intencionem principum sepius premissorum. Ut ergo omnia et singula pretaxata robur et firmitatem perpetuam sorciantur, presenti pagine Sigillum nostri conventus est appensum. Datum Rathibor Dominica secunda Adventus domini A. d. M°. ccc°. lxx°. v°.

Aus dem Copialbuch der Dominicaner.

Codex Diplomaticus Silesiae, hrsg vom Vereine für Geschichte und Alterthum Schlesiens, Bd 2, Urkunden der Klöster Rauden und Himmelwitz, der Dominicaner und Dominicanerinnen in der Stadt Ratibor. Hrsg von dr. W. Wattenbach, Breslau 1859.